بكرة تكبرو وتنسوا كل حاجة عملتها علشانكم

هتنسوا تعبى فى حملكم وولادتكم و رضاعتكم

وقله نومى و سهرى بالايام و مش حتفتكروا منظرى و أنا ماشية زى الزومبى ومش قدرة اقف.

هتنسوا إنى كنت بشيلكم و أنا بطبخ و بغسل و أنا فى الحمام و أنتوا شابطين فيا كلكم.

وأنى قعدت سنين مش باكل لقمه سخنه و لا بشرب كوبايه شاي غير متلجة علشانكم.

هتنسوا ان مكانش بيحلالكم البيبي غير وسط ما باكل و لا الترجيع غير بعد ما تغيروا هدومكم .

مش هتفتكروا لما تكبروا ضهرى اللى اتقطم و أنا بلم الدباديب وألعاب و لا رجلى اللى مشيت بعرج عليها أيام علشان دوست على المكعبات والحاجات المكسرة .

هتنسوا ريقى اللى نشف و أنا بعلمكم البطه بتقول كاك و العربية بيب والقطة ناو .

مش هتفتكروا اللى كنت بعمله و انتوا عيانين و النزول بلبس البيت و انا بجرى علشان حاجة وقعت عورتكم

و لا هتصدقوا العياط اللى عيطته بس علشان قلقانه من نتيجة تحليل مستنية يطلع

مش هتفتكروا الدكتور اللى كنت بقعد مستنيه دورى بالاربع ساعات و انا بحكى لكم حواديت لحد ما ربنا يكرم و نكشف .

هتنسوا شيلي شنط الدنيا علشان أخد هدوم و اكل و أدواتكم

وهتنسوا صحياني بدري في عز التلج و تحضيري لفطاركم و سندوتشاتكم و هدومكم بكل رضا

و حرقه دمى و أعصابي علشان بتمنى أنكوا تبقوا أحسن مني

أمانه عليكوا يا قلبى أنت وهي لما تكبروا أبقوا افتكروا أبسط حاجة ليا عملتها عشانكم

وابقوا برونى

اللهم ارزق أولادي ادىالعمل الصالح والعلم النافع وارزقنى برهم فى حياتى وبعد مماتى

ربنا يهديهم واشوفهم فى احسن حال آمين يارب العالمين