الشيف نعمة علي
اول حاجه هنجيب الفرخه بتعتنا هنغسلها كويس اوي مره واتنين
وبعد كدا هنبدا نقطعها ونخليها ولازم تكون السكينه معاكي حامية
علشان الفرخه متهدرش اي لحم
وبعد ما هنخليها هنبدأ نقسمها ناخد جزء للكباب وجزء للشيش وجزء الكفته ،
طريقة تحضير جزء الكفتة :
لازم نفرم معاه جزء من الليه وده مهم بتفرق في الطعم
وهنكون فارمين بصله وقرن فلفل احمر حلو
هنصفيهم كويس جدا لاننا هنحتاح الميه بتعتهم بعد كدا
وننزل بتفل البصل والفلفل علي الفراخ المفرومة
وعليهم التوابل :
ملح
فلفل اسود
وتوم وبصل بودر
وبابريكا
والسبع توابل
وشويه من البقدونس المفروم
ومعلقه كبيره نشا
وربع أو نص معلقه من البيكنج صودا أو الكربوناته
علي حسب الكميه ونخلط كل المكونات في بعض وعلى التلاجة
تاني حاجه طريقة تحضير الكباب :
هنقطع صدور الفرخه مكعبات
ونتبله بنفس التوابل
وبصله صغيره مفروم ناعم
ومعلقتين زبادي او لبن رايب
ومعلقه خل
وتالت حاجة الشيش :
نفس توابل الكباب وزيادة عليها توابل شيش
ومعلقتين زبادي او لبن رايب
ومعلقه خل
ونسيبهم في التلاجه أقل حاجه ساعه
ونيجي بقا لأهم حاجه :
ميه البصل والفلفل
هتنزل عليهم بمعلقتين زيت
معلقه كبيره معجون طماطم
رشه ملح
ورشه فلفل اسود
ورشه سكر
وندهن بيهم وش الكباب والكفته والشيش في نص السوا
ونقدم معاهم مكرونه أو رز بسمتي مبهر أو عيش
ولازم شئ اساسي معاهم سلطه الطحينة
وبألف هنا
