روايح رمضان مارس 27, 2022 roqyah2010@gmail.com ادب وشعر كلمات / عماد الألفي ******** يا روايح رمـضـان هِـلـِّي كمان وكمان هِـلِّي بخير وأمان خَـلِّي الكون فرحان يا روايح رمضان بهجة وأفراح وزينة وَيَّـة صوت الغـنـاوي مهما قولنا وحكيـنـا مش هتكفي الحكاوي وحبال النور صوابع مزوقة الجوامع وقـمر للفـجر طالع منـور الشـوارع في انتـظار رمضـان وفـرحة رمضان يا روايح رمضان يا شـارع الأصــالـة لينا من أيام جدودنا وياك ذكرى استحالة ننساها مهما عـشنا يا سوق العـطـارين يامـفـروش بالحنين كـنافة على الصفين وياميش وقـمر الدين في انتظار رمضان وفرحة رمضان ياروايح رمضان يا مَحْـلىَ الاحتفال بـرؤيــة الـهـلال واحنا في انتـظـار إعلان مُفتِي الديار والـكــل فــرحـان وبـيـدعي الرحمن يـِبَـلـَّغْـنـا رمضـان وفـرحـة رمضـان ياروايح رمضان
